خواطر

كل ما الواحد بيكبر اكتر بيكتشف ان الوشوش الحقيقية للناس مرعبة الطيب اللي بيحبك وكل الناس بتشكر فيه هتكشف مع الوقت عيوب مكنتش تتخيلها والطيب اللي بيحترمك ويقدم لك فروض الطاعة عمال ع بطال هتلاقي مواقف بتمر بينكم تكشفلك عيوب برضو مكنتش تتخيلها لدرجة تخليك تشك وتسأل نفسك طب الخدمات بقى اللي اتقدمت دي اضحك عليك فيها بقد ايه والا ايه والملتزم اللي بيقولك قال الله وقال الرسول وحلال وحرام ولا وغلط هتكتشف انه مع نفسه حليف الشيطان ويمكن كمان يكون ماضي معاه عقود بغواية الاخرين واللي بيساعدك لوجه الله مع الوقت هتلاقي مأرب اخرى واللي يحسدك واللي يستخسر فيك واللي يستكتر عليك النعمة حتى لو كنت ناقصك حاجات كتير من اللي عنده واللي يأذيك وانت عمرك ما اذيته واللي يكلم عليك وانت مبتجبش سيرته اصلا ويمكن تكون متعرفوش واللي يعاديك ويكرهك ويحاول ياخد منك حاجة انت وصلتلها بمجهودك وتعبك حتى ولو بالرشوة واللي واللي واللي ومهما كبرت ومهما مر بيك الزمن هتفضل تنبهر من اللي ورا الستار وهتوصل بيك انك متبقاش مطمن وفارض دايما سوء النية في كل الناس وهتفضل تبعد حتى عن الناس اللي انت متاكد من حبهم ليك عشان مبقاش عندك قدرة ع التواصل بس تخيل برضو بعد كل ده هتفضل اهبل ومش هتتعلم من تجاربك ومن كشف ربنا ليك للوشوش الحقيقية دي وبرضو مهما حرصت هتاخد ع قفاك وهتتخدع تاني وتالت وعاشر